政壇：搞搞政：立會保安漏洞多 陳維安顧唔掂

玻璃幕牆被狂攻

大樓設計以大量玻璃幕牆為主，寓意立會係民選機關，一舉一動要具有透明度，但就成為示威者攻入大樓嘅最佳工具。雖然陳維安事前已吩咐保安喺玻璃幕牆外放置大量鐵馬，阻止示威者闖入，但可惜百密一疏，冇喺餐廳隔籬嘅玻璃門前擺放鐵馬，令餐廳成為示威者其中一個攻擊目標。此外，由於大樓外牆好多係空心石屎，再加上立會嘅鐵馬較輕身，令示威者可輕易抬起鐵馬撞爛其中一道防火門嘅石屎板。

鑑於上次會議有議員助理利用職權放班示威者入大樓示威，陳維安除表明會考慮追究該等人士外，仲考慮註銷正在服刑嘅「長毛」梁國雄嘅議員證權限，等佢出獄後才重新啟動，避免有人利用佢張議員證搞搞震。民間團體同新界東北村民尋日原借用長毛嘅名義喺立會房間開會，但一班建制派即時向陳維安投訴，話長毛明明坐緊監，有乜可能陪佢哋開會。

最後民間團體搵咗議員張超雄幫手，張超雄向秘書處承諾會睇住佢哋開會，並確保所有人喺記者會後離開立會，秘書處先肯批出申請。對於人民力量主席袁彌明前晚用車輛阻塞立法會停車場出入口，事後建制派議員條氣好唔順，促請秘書處以後禁止有不良紀錄嘅議員助理將車輛駛入停車場。