「佔領中環」行動喺下星期五起一連三日舉行全民投票日，睇番兩年前特首選舉民間公投，都有黑客入侵港大民意研究計劃嘅投票系統，今次佔中投票都唔會例外。佔中尋日就喺社交網絡，透露PopVote投票系統前晚九時至十一時，以及尋日朝早八時至十一時三十分，遭到強烈DDoS（分散式阻斷服務）攻擊，導致部分連線出現問題，市民登入唔到，攻擊模式同之前攻擊支聯會以及六四紀念館網站一模一樣。

佔中發起人陳健民話情況睇嚟都幾嚴重，尋日下午基本上市民都登記唔到，港大民研正在搶修，睇吓有冇需要報警求助。佢哋話工作人員已經即時應對，盡力令連線暢順。其實佔中呢幾日畀網民模擬投票，依家咁早就受襲擊，等佢哋做定應變工作，未嘗唔係好事。

有網民就話預咗被人攻擊，希望之後投票嗰三日唔好畀人搞，更有人講到明，如果唔想畀人搞，就直情到實體票站投票，寧願排隊都要表達訴求喎！

第一手消息請下載on.cc東網iPhone/iPad/Android/Windows Phone Apps