政壇：黑英為慳水沖涼分半鐘

同環境局局長「星星」黃錦星鬥環保嘅天文台前台長「黑英」林超英，尋日出席地球之友節能比賽活動時，又講番鬥慳電輸畀星星嘅舊事，但原來講到用水，佢都要投降。因乜解究呢？黑英話因為佢嘅兼職傭工用好多水，入埋佢數好唔忿氣。

林超英（中）慳唔到水，歸咎兼職傭工用水多。

黑英計過自己沖涼半分鐘就足夠淋濕全身，如果用番梘後沖水，頂多用一分鐘，夾埋都係一分半鐘。佢又透露，自己沖涼連番梘都唔用，因為古時冇番梘，又承認冇乜洗頭，估唔到為慳水，佢都去得幾盡喎！

另外，環境局就未來發電燃料組合展開公眾諮詢，到今個星期三就完結。主持就以娛樂圈女藝人「A餐」同「B餐」嚟比喻南方電網同增加天然氣選項，但問到黑英鍾意「A餐」定「B餐」，可能佢驚被老婆扭耳仔，最後話兩個餐都唔揀！因為佢覺得港人可以有效減少用電，到時兩電唔使投資，就係「０餐」咁話。