港漂學生逼劏房 教育產業大隻講

太一叮唔係亂噏o架，港漂學生漂泊異鄉，來港升學首先要籌謀嘅就係搵個安身之所，弊在本港大學宿位奇缺，搞到好多內地生無處容身，如果唔想瞓街，惟有被迫蝸居劏房，成為本港專上教育嘅荒謬一幕。香港自詡國際都會，但係內地學生體驗到嘅竟然係好似第三世界嘅貧民窟生活以及劏房文化，你話香港係咪丟架吖？係咪失禮吖？

更諷刺嘅係，港漂學生成為劏房新客源，連前大學講師亦見獵心喜，將自己兩個單位改裝成十幾間劏房，專門租畀內地女研究生居住。本報記者前往上址視察，發現其中一個面積僅四百平方呎嘅單位，居然間出五間劏房，有大有細，月租由二千五百元至三千五百元不等，完全體現「食得唔好嘥」嘅香港精神。

睇見呢種奇景，大家可以想像，劏房問題已經嚴重到邊個地步喇。連為人師表嘅大學講師都投身劏房行列，打造「講師劏房」，相比之下，其他業主搞「豬欄劏房」、「雞寮劏房」、「工廈劏房」、「教堂劏房」，又何足為奇吖？特別家陣唔止基層蟻民貧無立錐之地，就算港漂學生亦苦無安身之所，劏房有乜可能唔遍地開花？

最好笑嘅係，外地研究生連住屋都有困難，前朝政府居然聲稱要發展教育產業，簡直就係廿一世紀嘅最大笑話。根據八間大學最新統計數字，目前本港共有一萬一千六百多名研究生，當中唔少係內地學生，可惜全港研究生宿位只得五千個，平均每兩個人爭一個宿位；重災區浸會大學情況最嚴重，非本地研究生一千七百名，宿位唔夠三百個，即係每五個學生中只有一位幸運兒。照咁睇嚟，港府能唔能夠打造區域教育樞紐唔知，不過打造區域劏房樞紐就綽綽有餘咯。

見微知著，大學宿位天殘地缺，就係本港房屋亂象嘅縮影。今屆政府成日話覓地建屋，寸土必爭，究竟到何年何月，無殼蝸牛至有安居之所？港漂學生就話暫時寄居啫，港人唔通要永遠蝸居劏房，永無翻身之日咩！

不如咁嘞，內地學生如果蝸居劏房有咗心得，讀書之餘，不妨順便研究香港嘅劏房文化，隨時攞獎o架，叮！