城中鏡：四叔減工作美麗華交棒畀二仔

美麗華酒店尋日舉行股東會，亦係人稱「四叔」嘅李兆基最後一次以美麗華主席身份主持股東會。四叔自言今年已經八十幾歲（資料顯示係八十有五），如果喺政府度做嘢，六十幾歲已經退得休，依家已經係「超時」工作咁話。佢又話自己年紀大，要多啲時間休息，所以會盡量減少啲工作，「重要嗰啲唔減住，普普通通嗰啲就減啦！」

四叔（左）話減少啲工作，右為其子李家誠。（資料圖片）

四叔冇再講邊啲係重要，邊啲係普普通通，估計旗艦公司恒基地產係重要嗰啲，既然唔做美麗華主席，呢個可以理解為普普通通囉。

將會接任做美麗華主席嘅二仔Martin李家誠就話，雖然四叔唔做主席，但仍然留喺董事局入面，而佢自己喺○四年已經加入董事局，都好清楚內部運作，相信公司嘅嘢唔會有改變。

對於依家不斷有聲音話削減內地個人遊數量，Martin個人就唔多贊成，不過就話內地個人遊旅客佔佢哋酒店整體客人大約百分之三十，相信影響有限。