城中鏡：副局飯聚 諗計增知名度
政府問責班子副局長同政治助理一向都被人話知名度低，以致市民認知度不足，早前就爆出立法會主席曾鈺成都唔識商務及經濟發展局副局長梁敬國嘅事件，就連財經事務及庫務局副局長劉怡翔、發展局副局長馬紹祥都曾被指太過低調。收到風，一班副局長前晚齊集山光道馬會食飯，席間曾傾談知名度不足嘅問題，有副局長坦言，佢哋唔係明星，所以唔使做騷咁做喎！
梁敬國（右起）、馬紹祥、楊潤雄、陸恭蕙同陳肇始約埋飯聚交流。
許曉暉承認副局長對外溝通有改善空間。
記者去到馬會飯局現場，確實見到多位副局長現身，除咗梁敬國同馬紹祥外，仲有資深嘅民政事務局副局長Florence許曉暉、食物及衞生局陳肇始、環境局Christine陸恭蕙、教育局楊潤雄、運輸及房屋局邱誠武等，但就未見新丁劉怡翔嘅蹤影。點解唔齊人？原來佢哋各有各忙，就算兩、三個月約一次飯局，都好難約得齊人，而前晚飯局就係今年第三次聚會，但都係唔齊人。
提議多啲搵記者傾偈
喺等候上菜期間，當然把握時間問佢哋點解決認知度不足嘅問題？梁敬國聽到後好敏感，即時大聲喊冤，話其實有好多人識佢，而且同好多立法會議員都識咗好耐，例如工程界盧偉國同商界林健鋒等，只係咁啱曾鈺成話唔識佢嗰日，識佢嗰班議員全部唔見人咋，強調事件純屬巧合。在座嘅副局長就打圓場話，佢哋平時都唔使點向主席拉票，所以主席唔識佢哋都唔出奇喎！
Christine就認為身為副局長，責任在於推銷政策，就各項政策向立法會同區議會解說，以爭取支持，所以知名度係咪必要呢？另有副局長話，佢哋唔係明星，又唔需要做騷，如果在意提升知名度，工作就會變得好簡單，但係致力提高知名度，其他工作就可能未必有足夠時間做嘞。不過，Florence承認佢哋真係有改進空間，例如多啲與唔同範疇嘅記者接觸同溝通，咁可以保持聯絡之餘，亦可了解其他持份者對政策嘅意見。
