中共國務院甫發表「奪權論」，那文本《白皮書》立即在中資書店有售，五蚊一本，薄切切，cheap篷篷。我在書店蹓躂近一小時，成棟《白皮書》沒有一人取閱過。

此本cheap書有點古怪，因它不用殘體字印製，竟以全正體字出版，是否只讓香港人與台灣人睇呀？定係想扮華夏正貨呢？

大陸書就係大陸書，如何「整容」，都露餡。一、要威。驚死無人知係大陸貨咁，在書面印着「人民出版社」的毛筆字款，土到嘔。二、全書所有「引號」都用雙逗號，而非香港本土傳統起角的「」引號。三、書封面設計像殯儀館的「吉儀」般，真大吉利是過佢！是否意味着叫人睇完拎去燒掉呢？

從一本小小的政治宣傳讀物，已看出大陸人毫不了解香港實況，除了上述的出版製作差異之外，也見中央領導層可能受「駐港的奴才廢柴」所誤導。

嗱！最簡單的判斷，今日香港之亂局，點解會搞成咁呢？香港市民點解咁渴望「自家特首自己選」呢？全因呢十七年handover之後，廢柴垃圾政府管治無方，由中央欽點的，只是懵貪謊之三流庸才劣精，好好一顆東方明珠、亞洲小龍都黯然謝皮，怎教港人不發圍。

話中央誤聽讒言，是有證有據的。正當今日全港市民過火屎，十日後要「全民公投」之際，你掟本《白皮書》出嚟只會火上加油，幫手吹雞，號召更多人「投票」、「佔中」和「七一大遊行」而已！香港人是嚇大的，吃軟唔怕硬，如今，你班強國領導當自己係周潤發演《黃金甲》，只會適得其反！唔信？五十萬人上街就過硬的了！只係看多幾多十o架啫！唔信？賭餐下午茶吖！

彭志銘

次文化考古學家，對城中潮語有深入研究，博徵博引，廢官廢人行埋一邊。

歡迎add我facebook一齊(目及)實政府

第一手消息請下載on.cc東網iPhone/iPad/Android/Windows Phone Apps