政壇：搞搞政：立會受衝擊 陳維安要孭飛
立法會財務委員會喺上周五審議新界東北新發展區前期工程撥款，大約四百名新界東北村民同學生成功佔領立會大樓地下大堂示威，搞到秘書處迫不得已要搵警方「平亂」，可謂係立會入伙以來最大嘅危機。
據聞，當立會搬入添馬艦新大樓後，秘書處已制訂好一套名為「4+4」嘅保安措施及風險評估，應付萬一出現嘅突發情況。第一個「4」係指示威嘅激烈程度，數字愈高代表情況愈亂，而第二個「4」就指有關示威嘅具體區域，會以英文字母為代號，包括只准授權進入嘅核心地帶、大樓外圍地帶等。保安部同秘書處會按當時實際情況將大樓情況列為不同級別，再按級別決定係咪搵警方協助。至於上星期五發生嘅示威，秘書處升至第「2A」級別，即係由保安人員應付示威活動，而警方就擔任後勤工作。
行政管理委員會前日開會後決定喺聽日財委會開會期間實施六項臨時措施，防止重演上周嘅混亂情況。不過，據聞秘書處唔會要求增加保安人手，但就提早「打定輸數」要求警方介入。因為有行管會委員提醒，秘書處要注意法律風險，話如果有保安因為立法會疏忽唔肯及早採取行動而引致受傷，隨時會被入稟法院追討賠償，而遲遲唔肯尋求警方協助嘅秘書處幾乎係必輸無疑。換句話，決定報警嘅秘書長陳維安將會孭重飛、負全責。
雖然秘書處大幅削減財委會公眾席座位，但唔少新界東北村民同愛字頭團體成員已經成功登記入場旁聽，而人民力量成員亦揚言到時會試圖入場「霸位」，相信聽日財委會又會有好戲上演。
