政壇：梁君彥縱容KK豎宣傳板
話說立法會尋日開大會辯論係咪引用《立法會（權力及特權）條例》調查高鐵延誤事件，點知泛民主派議員KK馮檢基竟然喺座位上展示咗幫佔領中環行動催谷六二二投票嘅「毅行爭普選」活動宣傳紙板，結果被建制派投訴同會議議題無關。不過，當時暫代主席職務嘅梁君彥就縱容阿基繼續擺放有關宣傳品，但到主席曾鈺成歸位後，立刻裁決要求議員收回宣傳板，簡直係摑咗梁君彥一巴。
當曾鈺成裁決議員展示普選宣傳品不當後，泛民莫乃光隨即幫隔籬左右「冚旗」。
「橄欖」陳鑑林喺會上投訴KK嘅展示品同討論高鐵延誤無關，KK就解釋，有普選先令高官問責制做得好，工程先至唔會亂上馬，大家先可以喺高鐵延誤呢啲大事件上搵出真相。對於呢個咁牽強嘅解釋，梁君彥竟然咁都收貨，難怪惹來建制派不滿，等曾鈺成返回會議廳主持會議時就再度投訴。最後曾鈺成作出裁決話，雖然議題同普選與管治有關，但就拉得太遠喇，而且展示板唔係講普選重要性，而係宣傳一項活動，所以要求議員收番枱上嘅宣傳板，而泛民只好乖乖收番埋啲宣傳板。
