舊年七一喺九龍城前啟德機場跑道舉行嘅「香港巨蛋音樂節」，已被質疑與七一遊行「打對台」，甚至被形容為「維穩騷」，當時爆出樂隊RubberBand玩杯葛，就算最後有出席活動，但樂隊成員都着黑色T恤贈興，而活動後又爆出立法會議員林健鋒為趕去音樂節而逆線行車被檢控嘅醜聞。不過，香港演出業協會並未因此卻步，反而諗住今年七一再辦巨蛋音樂節，但協會尋日發表聲明，否認搞音樂節係要「維穩」，聲言主辦活動目的係要證明香港需要一個大型表演場館喎！
香港演出業協會話，舊年嘅音樂節被錯誤解讀為「維穩騷」或「回歸騷」，對此深表遺憾。佢哋相信提升演出場地配套，全面發展演唱會旅遊，可為香港經濟作出貢獻，因此再申請舉辦巨蛋音樂節。
不過，揀正七一搞音樂節，確實令人聯想有意同七一遊行「打對台」，分化遊行人士，變相維穩。記得舊年音樂節當日遇上三號風球，搞到水浸，巨蛋變水蛋，仲有市民不適送院治理，結果大會要喺傍晚腰斬音樂會。
第一手消息請下載on.cc東網
