王國興話政府唔肯為狗仔隊提供櫈仔抖一抖。
因為「拉布」嘅關係，喺呢個幾月內，無論係泛民主派或建制派議員都要朝九晚十一坐喺會議廳表決，搞到唔少人都周身骨痛。喺立法會尋日嘅會議上，勞工界「潘少」潘兆平同「阿王」王國興不約而同關注會唔會將肌肉及筋骨勞損疾病納入《僱員補償條例》申索範圍，睇嚟「拉布」真係搞到佢哋身心受損喎。
阿王為AO狗仔隊吐苦水
潘少話唔少飲食業及零售業前線員工需要長時間站立，對勞工及福利局唔肯將下肢勞損嘅疾病列入職業病好失望。阿王就問當局會唔會制訂措施，等僱員企足一段時間就可以休息十分鐘，唔使成日冇得坐咁辛苦。阿王之後又為政府嘅AO（政務官）狗仔隊吐苦水，話狗仔隊需要長時間企，（目及）實議員嘅一舉一動，但有關當局就唔肯為佢哋提供櫈仔，等佢哋可以得閒坐低抖一抖。
勞工及福利局局長張建宗就話，由於下肢肌肉及其他骨骼疾病同僱員嘅生活習慣、年齡同家族病史有關，所以唔可以將呢啲疾病納入補償範圍。佢又話當局會繼續拍宣傳片，要求僱主為僱員提供腳踏、防震地氈呢類物品，等佢哋無咁易受傷。如果僱員可以證明自己係因工作遇上意外及受傷，可以向僱主提出申索，勞工處將會按實際情況提供協助。
第一手消息請下載on.cc東網
