政壇：建仔保安局又惹打龍通疑雲

立法會議員「長毛」梁國雄上星期「一時錯手」，執咗份保安局向建仔提供嘅「跟進提問」，踢爆保安局疑似同建仔「打龍通」，教埋議員點樣提問，認真爆。事隔幾日，保安局局長黎棟國尋日出席立法會大會，回應建仔葉國謙提問時，可能解釋得太詳細，主席曾鈺成都罕有截停佢發言，話要畀時間其他議員發言，結果又惹來民記同保安局「打龍通」疑雲。

話說有議員就有民運人士來港被拒入境提出質詢，質疑政府決定背後有政治考慮，甚至有「黑名單」。阿謙就問入境處拒絕入境嘅政策，係咪同國際做法類近，似係畀保安局下台階。黎棟國梗係話入境處做法同其他國家冇分別，仲好長氣咁講歷史講足幾分鐘，難怪被主席罕有叫停。提出質詢嘅陳家洛忍唔住質疑，阿謙嘅提問係咪保安局提供，認為兩人夾計嘥晒佢啲提問時間，阿謙隨即發火反駁，炮轟陳家洛言論係「非常侮辱性嘅講法」。