趁住立法會放暑假，好多事務委員會都有出訪計劃，例如立法會議會聯絡小組委員會正籌備緊今年暑假、暫定八月組團去北歐芬蘭、挪威、丹麥三國外訪八日，又例如工商事務委員會決定出訪以色列，聲稱係為咗考察當地政府點樣推動創新科技發展咁話，最新出爐嘅係交通事務委員會。嘩！係咁出團，唔通真係驚蝕底？

立法會交通事務委員會尋日正式發通告，指委員會計劃於本年九月二十三至二十六日去新加坡外訪，話考察「電子道路收費系統（ERP）」同「智能路線訊息系統（IRIS）」嘅運作喎。不過，其實香港早响八十年代就探討過ERP嘅可行性啦，仲响中環試行過，只係最後因為民間反對聲音太大擱置咗，加上新加坡已實行ERP十幾年，點解班議員遲唔去、早唔去呢？考察完對香港有乜嘢作用呢？莫非真係借外訪為名，去遊埠為實？

交通事務委員會今次去新加坡嘅訪問，除咗會去睇當地嘅ERP同IRIS，研究當地地鐵系統同輕鐵發展，仲會了解公共交通管理措施嘅最新發展同運作情況，但呢啲考察有幾大幫助，相信大家心裏有數。至於考察費用喇喎，每位議員响每個四年任期，都會有五萬五千元嘅海外職務訪問津貼，而今次訪問團就梗係可以用埋佢哋餘下嘅個人海外職務訪問津貼啦！

不過，最重要嘅係今次旅程提供平民版同豪華版任君選擇，如果議員揀坐飛機經濟客位，就只須扣除帳目嘅一萬一千六百元津貼，商務客位就盛惠二萬六千八百元。

香港飛新加坡嘅機程只係四個鐘頭，咁嘅短途機都有得揀坐商務客位，怪唔之得議員咁鍾意去考察喇！

第一手消息請下載on.cc東網iPhone/iPad/Android/Windows Phone Apps