何須削減人數 自有驅蝗趕客
港府最近放聲氣話要削減個人遊來港數目，可惜有關爭議唔單止冇平息，仲愈演愈烈添。呢，啱啱過去嘅星期日之嘛，屯門一間新藥房開張，被一班搞事者踩場，亦有團體喺荃灣抗議該區被個人遊旅客逼爆，趕絕晒本土特色小店。
老實講吖，每逢周末長假，驅蝗、拖篋等示威活動已經係指定動作，大家早已見怪不怪。不過計太一叮話齋，呢班激進分子係時候返屋企抖吓嘞，事關佢哋趕客嘅不懈努力已經得到回報，愈嚟愈多內地旅客買佢哋怕，對香港避之則吉。港府公布四月份香港整體零售額大跌一成，遠高於市場預期，其中珠寶首飾等奢侈品嘅銷售額更下跌四成；零售管理協會主席麥瑞琼亦大吐苦水，話雖然上月內地有「五一黃金周」，但業界明顯感受到個人遊消費疲弱，訪港人數亦出現下跌，估計五月份嘅零售業銷貨值唔會好得去邊。
又難怪嘅，人哋嚟旅遊都係想散吓心、買吓嘢啫，結果慘遭白眼甚至被辱罵，梗係走夾唔抖啦。內地官媒最近一份網上調查顯示，約七成受訪者表示，未來一年冇計劃訪港，其中近一半表示唔想被歧視，又或者批評香港唔夠人情味。正所謂，死了張屠戶，不吃帶毛豬，世界上好玩好客嘅地方多的是，旅客又何苦專門嚟香港貼錢買難受呢？
個人遊都未真正收緊，負面影響已經陸續浮現，唔單止業界擔心，連港府高層都腳軟。財政司司長曾俊華喺網誌文章中強調，社會喺思考個人遊課題時，既要考慮對市民生活嘅影響，亦要顧及經濟同就業，更唔可以破壞香港「好客之都」嘅形象喎。
唓，鬼唔知阿媽係女人咩，又想賺遊客錢又想生活寧靜，世界邊有咁理想o架？其實，個人遊之所以帶嚟咁多後遺症，歸根究柢，咪因為港產官僚目光短淺，一開始當內地客係提款機，一味貪多，點知接待能力跟唔上，卒之咪消化不良「食滯咗」囉。嗱，行政會議召集人林煥光就老實得多嘞，佢承認個人遊爭議涉及城市管理問題，政府應開拓新嘅空間，避免過多旅客聚集同一區，以解決問題。
冇錯嘞，香港係自由市場，旅客嚟多咗，應該諗吓點樣增加旅遊設施。不妨打個譬喻吖，一間餐廳客似雲來，日日做到冇停手，本來係好事，弊在餐廳淨係夠位招呼一百人，結果嚟咗一千人，呢個時候做老闆嘅肯定會擴充樓面，增加接待能力，邊有閉門趕客咁愚蠢吖。
係嘞，講好嘅邊境購物城呢，當局仲要拖到幾時呀？叮！
