唉！早已對政務司司長林鄭月娥無乜期望，但見佢面對個中學生黃之鋒的表現，則更透徹的失望。

林鄭小妹妹年代，即做環境局局長時，就強拆天星碼頭，敢單拖赴會，雖口震震地，但仍有舌戰幾十個保育專家學者之本色，或許嗰陣博上位死頂吧！

估不到紮職後，連個塞豆窿都頂唔住！仲話係一人之下，萬人之上嘅精英表表者？

話說林鄭出席政改論壇前，被黃之鋒截停，向她遞送一個吹氣的塑膠錘仔，諷刺佢早前撐過政改「一錘定音」的人治方案。林鄭唔敢接收錘仔，並以家長式口脗話「我唔係細路仔，唔玩呢啲嘢」，更指摘那死o靚仔：「你都受過教育o架，識唔識乜嘢叫尊重？」點知這位小朋友反駁：「我就唔知林鄭識唔識得尊重民意喇！」輕易地便KO咗個特區第二位嘅政治高官。

其實，政務司司長人未到，已有手下清理現場環境，通咗風報定信，行去「示威者」度，係早有準備的攞彩o架啦！點會自己攞架嚟丟o架？

這麼一個大好機會，顯示自己擁有再高升一級的能力，都變成挾尾落荒而逃，露晒底，真失敗！

等我紮好條頭帶，開壇做國師，教林鄭如何化解兼砌低條死o靚仔啦！喂！無收你任何費用o架！

首先，一手接過那吹氣膠錘仔，請黃之鋒小朋友幫手，拉開錘仔個氣塞，等佢放氣出嚟，錘仔皺皮，便拍住黃小朋友膊頭，笑向傳媒說：「一錘定音？我早就『放棄』了！正如政改不能有人話你想點就點嘅！應合情合法，有商有量，畀全港市民依法選特首！按《基本法》，提委會係唯一提名特首候選人嘅機關……」咁咪攞滿分囉！使乜擺副家長款嚟兇細路吖？面懵隨口噏唔使本之餘，更是高官榮祿的助燃劑呀！

彭志銘

次文化考古學家，對城中潮語有深入研究，博徵博引，廢官廢人行埋一邊。

歡迎add我facebook一齊(目及)實政府

第一手消息請下載on.cc東網iPhone/iPad/Android/Windows Phone Apps