尋晚喺一個晚宴中見到一班時代女性，佢哋各有動向，亦好享受生活，好似前港姐張瑪莉就透露，自己教授禮儀同企業形象。問到第二任丈夫係咪姓余？佢坦言：「係，兩年前結婚。婚姻生活好好，老公係建築師。」佢透露啱啱同老公、女兒到希臘同土耳其旅行，佢又話依家經常旅行，少留喺香港，主要澳洲、美國同香港三地走。問到會唔會多啲同老公旅行增進感情時，佢邊行邊話：「我哋好好，唔使增進感情。」

張瑪莉話啱啱同老公、女兒到希臘同土耳其旅行。

黃紫盈早前去泰國公幹提早回港，避開戒嚴同宵禁。

陳晴將帶埋囝囝去紐約business trip，仲幫佢報咗個暑期camp。

轉頭見到聯合國兒童基金香港委員會主席陳晴，佢話依家擔任副秘書長顧問，雖然經常要飛去紐約開會，幾乎一個月一次，但佢話好高興擔任此職。咁係咪少咗時間陪三歲半嘅囝囝？佢話：「冇時間，不過有時都會帶埋佢去。暑假都好多嘢做，有個business trip，去紐約十日，都會帶埋囝囝，報咗個暑期camp畀佢學習。」

早前泰國局勢混亂，原來電視台前新聞小花黃紫盈早前去泰國公幹提早回港，避開戒嚴同宵禁，佢仲笑言自己大命。

睇到佢臉上有明顯紅印，佢直認係皮膚敏感，因為近期工作繁重，仲話好想去旅行減壓添！佢話：「好鍾意去旅行，探當地朋友，因為成日周圍留學。」

第一手消息請下載on.cc東網iPhone/iPad/Android/Windows Phone Apps