城中鏡：演藝界大吐苦水
本地文化藝術界人士一直批評，負責文藝政策嘅民政事務局局長曾德成淨係識得出席埋啲開幕剪綵活動，以及每周做一次「鍵盤戰士」，透過寫網誌同外界「神交」，甚少同佢哋面對面坐低認真傾談。不過，尋日行經金鐘就發現多位音樂、舞蹈同演藝名家雲集政總內嘅一間餐廳，同曾德成摸住茶杯底有傾有講，原來局長今次「破格」廣邀呢班相關業界嘅人士出席茶敍。據知多位業界代表都趁機向局長大吐苦水，勁呻本地藝術界嘅訓練、表演場地都唔夠，促請局長真係做啲嘢解決呢個老問題。
民政事務局副局長許曉暉（右二）自言係劉兆銘（左二）劇迷，兩人與曾德成（中）、康文署署長馮程淑儀（左一）同作曲家及作詞家協會主席陳永華（右一）合照。
費明儀希望當局為年輕人提供更多發揮機會。
鄭瑤璋透露芭蕾舞學會今年踏入五十周年。
政總內嘅社企餐廳人頭湧湧，細探下見到本身為國際聲樂名家嘅藝術發展局音樂組主席費明儀、資深演員「Ming Sir」劉兆銘同芭蕾舞學會主席Ada鄭瑤璋等人，之後仲見到多名民政局同康文署高官，非常熱鬧。
民政局望一年一茶敍
Ada茶敍後透露，尋日係佢第一次同曾德成直接交流，好多業界代表都向局長反映業界訓練、表演場地不足嘅問題。佢明白香港地價同租金高昂，場地問題好難解決，但都希望政府明白佢哋嘅處境，唔知局長收唔收到呢？
費明儀就笑言平日出席活動成日都見到曾德成，但真正交流都係第一次，希望除咗西九文化區之外，政府仲會為佢哋提供更多發展空間，尤其要畀年輕業界更多發揮機會。不過由於業界代表太多，局長就只有一個，費明儀最後都搵唔到機會同局長詳談，認真可惜。
據知民政局尋日搞呢個茶敍，主要有感平日同業界會面局限喺官式場合，所以想藉非正式場合同業界輕鬆交流，仲話希望呢類型茶敍可以長搞長有，做到每年一次。至於曾德成離開時，就繼續大耍官腔，話局方會認真考慮業界意見，然後就極速鬆人。講真，淨係聽意見冇用嘅，要真係解決到場地不足嘅問題先得，否則搞多一百次茶敍都係嘥氣。
