設計圖片及對白
早排港台管理層同港台製作人員工會就檢討《節目製作人員守則》出現分歧，廣播處長鄧忍光被指要求刪去「促進公共價值、表達自由」等字眼。
引英文諺語拋書包失禮
鄧忍光尋日上咗立法會資訊科技及廣播事務委員會解畫，同港台工會主席蔡玉玲公開對質。佢話喺一○年訂立嘅港台《約章》已將港台嘅使命、信念寫晒落去，形同港台嘅憲法，如果將工會提出、並冇喺《約章》提過嘅新字眼，加入等同附屬法例嘅《守則》之內，不但係鹵莽兼冒進嘅行為，仲係有違常識，「理所當然地，一個附屬法例當然不可以超出憲法範圍，這是常識」。蔡玉玲則反駁，《守則》早於九八年面世，質疑管理層做法係先提出新關卡同「搬龍門」。
佢之後仲未肯收口，笑騎騎咁話：「有一句名言，『所有通向地獄的道路，都是由良好意願鋪成』。」搞到大家一頭霧水。其中議員劉慧卿就質佢，係咪想話啲員工嘅建議，令港台甚至整個香港通往地獄？有議員話佢英文唔好，就唔好亂拋書包引用英文諺語。有議員更加話佢不但英文唔好，中文更爛。蔡玉玲就直言對佢嘅言論，感到既傷心又羞愧。
鄧忍光亂咁點火，連建制派議員都唔敢點撐佢，最後委員會喺泛民支持、建制棄權下通過無約束力嘅動議，促請港台管理層尊重同接納員工嘅意見，明落佢面。但話說回來，佢今年九月就任職處長夠三年，根據政務官（AO）傳統夠期可被調走，尋日佢公然同工會反枱開戰，唔知係咪想博快啲畀人調走，離開港台呢個「AO地獄」呢？
第一手消息請下載on.cc東網
