早前都講過立法會工商事務委員會決定出訪以色列，聲稱係為咗考察當地政府點樣推動創新科技發展，但喺激進泛民議員拉布下，能否順利成立創新及科技局仲係未知之數，議員搶閘出訪以色列，有趁機免費外訪、而且唔貴唔去之嫌。立法會秘書處尋日公布考察團九人名單，發現大部分都係嚟自工商及專業界功能組別嘅議員，其中公認最有米嘅政團經民聯，更加同時有林健鋒、梁君彥同盧偉國三位代表，佔成個訪問團三分一名額，唔通真係愈有錢嘅人就愈貪心？

其餘六名團友仲有同樣富貴嘅富貴黨鍾國斌，同埋五名「中產」議員體文界嘅馬逢國、資訊科技界莫乃光、法律界郭榮鏗，以及白鴿黨嘅劉慧卿同單仲偕，相對基層草根政團就一個代表都冇。今次以色列之旅為期六日，每人使費預計要成二萬九千五百元至五萬八千元，不過就可以喺議員嘅個人外訪開支額中扣數，非常抵玩。

第一手消息請下載on.cc東網iPhone/iPad/Android/Windows Phone Apps