政壇：西九諮詢會人人喊摺埋
「也許衰開有條路，天天都煩惱」，丟空十幾年仍然爛地一塊嘅西九文化區，就正正唱緊呢支歌仔。西九文化區超支兼完工遙遙無期，加上董事局「大換血」在即，尋日再被踢爆西九管理局諮詢會（諮詢會）猶如橡皮圖章，一年先開得嗰一、兩次會議，連建制派議員都批評諮詢會職權狹窄，無論泛民建制都一致認為諮詢會應該「摺埋」，以免浪費時間同金錢。
設計圖片及對白
一二年只開一次會
立法會一個委員會尋日討論西九管理局諮詢會嘅職權，公文袋「袋巾傑」梁家傑第一個踢爆諮詢會猶如橡皮圖章，一年只開兩次會，一二年索性只開一次會，質疑呢個會有乜存在價值；其後連建制派議員都加入戰團，其中建仔鍾樹根先讚後彈，話諮詢會內個個都係社會賢達，唔應該浪費呢班精英寶貴時間，索性叫成個諮詢會「執咗去」；工聯會陳婉嫻則建議諮詢會重組架構，甚至擴大職權，以免好似依家咁唔湯唔水。
泛民建制齊轟西九諮詢會，最無辜一定係諮詢會主席梁智仁，尋日喺立法會被鬧足成個鐘，但實情係佢去年年尾先接受委任，因此白鴿黨嘅劉慧卿特別關心佢時間分配問題，話佢身為醫管局主席，如果要佢兼顧埋諮詢會工作，根本分唔到身。
點知梁智仁一有機會就答得老實不客氣，直言自己接受委任時諗住一年開兩次會，如果真係要擴大諮詢會嘅職權，就要諗吓係咪繼續做喎。話時話，西九依家屋漏偏逢連夜雨，錢又唔夠人又無，如果當年「貪曾」前特首曾蔭權爵士唔係好大喜功而大搞西九，今日就唔會有呢個大頭佛啦！
