預算案總算過關 拉布騷沒完沒了

即係咁，立法會經過長達一個幾月、合共一百三十幾粒鐘嘅辯論同表決，前晚終於三讀通過預算案，政府總部可以繼續「門常開」，公務員唔使擔心冇糧出。不過咁，由於議程「大塞車」，唔少涉及經濟同民生嘅撥款受到影響，可能會延遲幾個月至通過，如果再遇上拉布咯喎，更加可能遙遙無期添。

呢，連財政司司長曾俊華都話，雖然針對預算案嘅拉布已經結束，仍有少數議員喺財委會及工務小組委員會拉布，除咗延誤項目推展，亦可能影響工程造價。佢仲預測，根據過去兩年經驗，明年情況並唔樂觀喎。

鬍鬚曾預測財政數字斷估冇痛苦，次次都估錯晒，但對拉布嘅判斷都算有啲譜，唔係杞人憂天o架。理由好簡單，今時今日行政立法關係咁惡劣，激進議員拉布拉上癮，明年又點可能樂觀吖。唔使講到咁遠，依家嘅情況就唔樂觀喇。

就好似成立創新及科技局咁吖，港府一廂情願咁話，如果進展順利，財委會本月底通過撥款後，最快十四日，即七月中創科局就可以正式掛牌開檔，你信唔信吖？梗係唔信喇，有泛民議員另闢戰線，發起第四線拉布，成立創科局嘅大計成為下一輪拉布嘅目標，幾時可以過關，根本冇人知道。

話時話，針對財政預算案嘅拉布已經成為一年一度嘅政治鬧劇，大家都見怪不怪咯。正所謂，欲拉之布，何患無辭，港府施政無能，甩漏不斷，授人以柄，政客隨時都可以搵到藉口拉布，而且想點拉就點拉，想幾時拉就幾時拉，想拉幾耐就拉幾耐，港府完全束手無策，只能夠望天打卦嘅咋。

拉布騷成為議會常態，市民就算深惡痛絕，都無可奈何。冇法子喇，喺嚴重扭曲嘅「民主霸權」之下，官員變晒鵪鶉，納稅人焗住要為拉布造成嘅公帑浪費埋單，真係冤哉枉也。

所以話，自作孽，不可活。本港競爭力每況愈下，發展遠遠落後於周邊地區，咪就係咎由自取囉。中國社科院近年多次警告香港，社會泛政治化，行政效率倒退，係香港競爭力後勁不繼嘅根源，可惜根本冇人聽得入耳。香港家嘈屋閉，政治爭拗不斷，立法會變成垃圾會，政客譁眾取寵，政府無能為力，香港想唔玩完都幾難，叮！