城中鏡：羅台秦研廢膠煉油
好多人都話支持環保，但又有幾多人真係身體力行？仁愛堂尋日舉辦全年大型籌款節目巡禮，主席吳明珍、副主席史顏景蓮、羅台秦同鄧錦雄都有出席，大家講得最多就係環保。
羅台秦（左）同鄧錦雄（右）都對環保工作非常着緊。
林金銓（右）細數食物對碳排放量嘅影響。左為總理徐永康。
史顏景蓮（右起）、新聞處處長聶德權同吳明珍都有到場。
主力負責仁愛堂環保園塑膠資源再生中心工作嘅羅台秦話，廢棄塑膠除咗可以回收嚟製作塑膠原材料外，佢哋仲研究緊將廢膠重新提煉變成柴油，供工業或汽車使用。佢好有信心話，經妥善管理後，預計可以有效平衡環保業務嘅收支，甚至轉虧為盈。
鄧錦雄就話環保係一個習慣同文化，所以環保必須配合教育先可以有效推行，好似佢哋推廣減碳排放活動，就要話畀大眾知，行一層樓梯可以減少超過二百克嘅碳排放，又可以當做運動，一舉兩得，而搭少次車，都可以幫到個地球。佢仲話點解以前啲家傭可以服侍一個家族幾代人，就係因為佢哋運動量多，所以壽命分分鐘比僱主長喎！
食少餐牛排減兩公斤碳排放
同場仲見到好多新面孔，包括今屆新丁總理何歐陽翠華、張嘉齊同林金銓。從事海鮮生意嘅林金銓話，中國人進食海鮮嘅比率好高，喺東南亞等地區出口嘅海鮮九成係賣去中國，而佢哋留喺自己國家嘅海鮮當中，亦有一部分係被中國遊客食咗。雖然時下唔少機構提倡食環保海鮮，但佢話食牛嘅碳排放量仲高，食少一餐牛排可減少超過兩公斤碳排放，大家不妨改變吓飲食習慣，支持吓環保喇！
