前晚六四二十五周年撞正立法會大會,令晚間流會嘅機會大增,因此建制派同泛民主派內部早有默契,喺立會表決完預算案同加煙稅草案後,雙方都唔會玩突襲,等班泛民議員可專心落維園,建制派亦可安心落馬場或返屋企瞓覺,等翌日朝早復會後先再砌過。

設計圖片及對白

點知泛民陣營嘅新同盟議員范國威開始動議特權法查高鐵延誤議案發言時,因為自己有一項修正案而被迫留守立會嘅外號「正盲毛」、公文袋議員毛孟靜,無喇喇突然要求響鐘點人數,當堂嚇到范國威同公文袋黨友陳家洛呆咗,雖然之後陸續有人趕返立會,但最終都阻止唔到呢場歷來最無聊嘅流會鬧劇發生。

泛民趁飯盒會聲討

事後「正盲毛」仲死撐話,因特權法查高鐵議案好重要,擔心建制派會喺泛民去晒維園期間突襲投票先要求響鐘,又指摘建制派唔齊人先會導致流會,但實情係前晚缺席嘅大多為泛民議員,亦根本冇建制派諗過突襲。

事後唔止建制派譴責「正盲毛」嘅行徑,連佢班泛民盟友同黨友,亦齊聲質疑佢亂響鐘,決定喺今日嘅泛民「飯盒會」跟進事件,聲討「正盲毛」。

「正盲毛」亦連累佢位黨魁「袋巾傑」梁家傑同時被建制同泛民責難,炮轟佢冇管好自己啲黨員。我哋尋日問袋巾傑點解「正盲毛」要響鐘,佢答話:「我都想知點解!」

但亦有議員指出,其實前晚響鐘時,建制同泛民都仲有議員身處立會,包括公文袋議員郭家麒,懷疑當中有人故意唔返會議廳,等「正盲毛」孭鑊。郭家麒承認佢曾經由維園返番立法會,之後再重返維園,期間冇留意到有人響鐘喎,真係信不信由你。

第一手消息請下載on.cc東網iPhone/iPad/Android/Windows Phone Apps