政壇：克勤仔成日畀人叫錯名

做咗只有幾個月商務及經濟發展局副局長嘅梁敬國，大家唔認得佢並唔算驚奇，但立法會議員陳克勤活躍政壇多年，做過特首辦助理，又多次當選區議員同立法會議員，到依家仲成日有人搞錯佢個名，真係要自己檢討吓咯！克勤仔尋日喺社交網站上載咗幅相，話食環署近日寄咗封信去佢議辦，地址居然寫住「李克勤議員辦事處」，佢助理收到封信後，都話唔知拆唔拆好。佢又自爆，佢喺地區亦成日畀街坊叫錯名，除咗李克勤之外，仲有陳克強同李克強等，扮完歌手再變身國務院總理，你都咪話唔勁。