政壇：港姐級女警宣傳反賭波
今時今日做阿Ｓｉｒ認真唔簡單，警隊四大名捕之一嘅Ｏ記（有組織罪案及三合會調查科）為打擊巴西世界盃期間嘅非法賭波活動，除部署一連串行動，更搞搞新意思拍攝宣傳片，出動三大主角，分別是向其他部門借將嘅一名「港姐級」女警、電影《喜劇之王》扮演「外賣仔」嘅演員同一名警官嘅可愛小女兒。
Ｏ記出動港姐級女警拍攝宣傳片反賭波。
故事講述扮演豬肉佬嘅外賣仔成功追求港姐級女警組織家庭，並誕下可愛女兒，本來一家三口相當幸福，點知豬肉佬沉迷賭波，之後更發夢自己成為外圍莊家發大達，片中一句對白：「若要收入好，要做外圍佬」，怎料被Ｏ記探員一網成擒，好彩只係發夢，否則妻離女散，故事結尾雖然老套，就係千祈唔好參與非法賭波活動，「若要收入好，都係做番豬肉佬」。
