政壇：官員去立會有好多禁忌
立法會就財政預算案撥款條例草案嘅拉布戰，花咗一百三十一個小時，前日終於獲立法會三讀通過。開會時間流流長，有啲議員上吓購物網，好似「日以繼夜、夜以繼日」嘅工聯會王國興咁，可以盡情咁寫大字，抗議泛民主派三子拉布，又可以花時間去計吓拉布三子嘥咗幾多公帑，批評佢哋係「千萬議員」，同埋啲錢夠買幾多罐午餐肉，起碼有啲細藝，但班枯坐嘅官員又點呢？真係郁都唔郁得o架，事關有乜依郁都死呀！
設計圖片及對白
煲《議事規則》抗睡魔
我哋聽聞，政府驚班官員喺拉布期間無聊得滯，亂咁上網睇嘢，搞到類似教育局局長「吳得掂」吳克儉咁，喺議會廳睇股票，出晒醜，咁就認真唔得掂喇！又或者好似白鴿黨議員「AV仁」何俊仁用平板電腦睇艷照等事件，不務正業，衰到貼地，有「人辦」你睇，正所謂前車可鑑，所以政府向官員發出口頭指引，叫佢哋唔好亂睇嘢。
聽聞指引要求官員唔可以瞌眼瞓，唔好用手機或平板電腦睇同大會無關嘅嘢。
心水清嘅人都記得，除咗吳克儉上網偷睇股票走勢之外，前教育統籌局局長李國章亦曾經開會時打機耍樂，所以呢啲溫馨提示真係唔怕講多幾次。
唔畀玩，咁睇文件實冇錯喇！但係指引又話唔好睇機密文件，事關如果地政規劃官員攞張地圖出嚟睇，唔覺意指住某地區或某幅土地，容乜易被人話放水畀發展商喎！
動彈不得，結果班高官做乜好呢？聽聞有人就趁機咪熟《議事規則》，勁搞笑嘅係有啲人索性抄寫練字消磨時間，唔係又點力抗周公嘅急call？
