「活在當下 珍惜眼前人」
【本報訊】血的家庭悲劇，引發淚的感觸和反思，一段「探員感言」撥動心弦。小莉莉成了家變犧牲品，聞者心酸：「孩子何罪？」當差二十六年的重案組探員見慣血腥兇案，但此案令他刻骨銘心，完成工作後心情久久未能平復。作為一名警員、孩子的父親、妻子的丈夫，他面對眼前場景，感觸萬分流下男兒淚，寫下肺腑感言，寄語所有人要「珍惜眼前人」。
疑兇父親（左）由探員陪同到殮房認屍。
探員帶同疑兇丈夫（藍箭嘴）到醫院探望兒子（紅箭嘴）。
「老差骨」感言昨日在網上流傳。
當差26年 此案最心酸
重案組探員徹夜蒐證，既要工作又要承受心理的衝擊。當差二十六年的探員事後撰文抒發感想，「接過無數咁多單老謀（謀殺案），呢單最心酸，响現場一路做一路想喊，個妹妹好得意，畀媽咪响條頸度斬咗十幾刀，個頭爭啲甩，事發時哥哥响屋外。」「無論身形和年紀，都同我細仔好似，個細路好乖好平靜，好詳細咁答我哋問題，我好唔忍心問。」父親早已失蹤，一夜之間痛失親妹，母親又要面對無限期的醫院令，不禁擔心他的將來，問男童：「肚餓嗎？」時，他回應：「叔叔，其實我肚餓，但我食唔落。」他聽到後「個心好痛，我入屋幫佢執啲替換衫褲時，佢仲提我可唔可以幫佢執埋套運動衫，我聽日要上運動堂。我當時真係擰歪面，啲眼淚忍唔住流咗出嚟。」
文中又提到準備收隊時：「我坐在疑兇張床度，（因為成屋血，我實在搵唔到其他地方坐），望住妹妹的衫仔鞋仔，玩緊嘅積木散落一地，好似代表頭家一樣，散」，「個心好痛好痛，小朋友有咩罪？」最後他希望所有人明白「活在當下，要珍惜眼前人」。
老差骨撰文節錄：
「响現場一路做一路想喊，個妹妹好得意，畀媽咪响條頸度斬咗十幾刀，個頭爭啲甩……」
「佢（阿哥）同我講，自從舊年中秋開始，我就無見過爸爸啦……」
「我問佢你肚餓嗎？佢話叔叔，其實我肚餓o架，但係我食唔落。我聽完個心好痛。」
「我入屋幫佢執啲替換衫褲，佢仲提我，你可唔可以幫我執埋套運動衫，我聽日要上運動堂。我當時真係擰歪面，啲眼淚忍唔住流咗出嚟。」
「望見妹妹嘅衫仔、鞋仔，玩緊嘅積木散落一地，好似代表頭家一樣……散。」
「個心好痛！好痛！小朋友有咩罪？」
