巧立名目遊埠 政客雙重標準
講起以色列，相信大家一定會諗起耶路撒冷，亦即係世上三大宗教嘅發源地，全球數十億信徒心目中嘅聖城。勢估唔到，尊貴嘅立法會議員亦爭崩頭去呢個千年古國朝聖，不過唔係出於宗教信仰，而係去考察創新科技喎，你話係咪九唔搭八吖。
立法會工商事務委員會係咁講嘅，以色列政府近年不遺餘力推動創新科技發展，有好多可供借鏡嘅地方，建議各委員喺暑假期間前往考察，行程包括參觀當地大學、研究機構及政府相關部門，同業界會面等等。如果乘坐商務客位，每人盛惠五萬八千元；乘坐經濟客位亦差不多要三萬元，由於唔係自掏腰包，聽聞得到過半數委員響應。
即係咁，如果真係有需要，立法會議員出外考察無可厚非。問題係，去嘅地方係咪適合，考察係咪有成效，就必須認真諗清楚。須知道，「爾俸爾祿，民脂民膏」，公帑應使則使，應慳則慳，否則個個唔執輸，人人大花筒，將公帑當成環遊世界嘅旅費，咁仲得掂嘅？
呢，好似今次去以色列咁吖，如果議員們去考察歷史宗教，冇人會質疑，之但係去考察創新科技咯喎，唔惹人疑竇就奇嘞。講真，以色列人做生意就話頂呱呱啫，科技水平雖然唔錯，不過同樣有科技實力、值得香港學習嘅地方大把喇，亞洲四小龍之中嘅新加坡、南韓都係佼佼者，點解議員們捨近取遠，捨易取難？如果唔係巧立名目去遊埠，真係講都冇人信啦。
嗱，根據立法會行政管理委員會安排，每名議員都有五萬五千元海外職務訪問帳目，供佢哋參加委員會外訪使用。正所謂不吃白不吃，不用白不用，咁大筆錢擺喺度，政客又點會客氣吖。唔係以小人之心度君子之腹o架，大家應該仲記得，去年爆出八名立法會議員同一名行政會議成員接受航空公司款待攜眷旅遊嘅醜聞，被質疑接受利益，最終喺輿論狂轟之下，不得不認衰道歉。咁你話嘞，議員們假公濟私，係咪早就有前科先？
話時話，香港政客最叻雙重標準，寬己嚴人。對於前特首曾蔭權爵士接受富豪款待，瘋狂外訪，人人搶佔道德高地，口誅筆伐；對於前廉政專員湯顯明用公帑送禮，茅台換政協，個個義正詞嚴，狂轟猛炸。殊不知有口話人冇口話自己，個個講一套做一套，結果咪自暴其醜囉。
所以話啫，政客貪得就貪，食相難看，無恥程度好唔過「絕代雙貪」幾多嘅咋。唔怪得立法會有垃圾會之名，而議員嘅民望仲衰過官員喇，叮！
