SUN搞作:SUN官場現形記:萬中無一
機場保安淪陷,繼之前踢爆因玩手機分神讓致命利刀入侵機場禁區後,今次有人背着背囊穿越機場離境大堂職員通道安檢,走進禁區無人知,在場四名保安人員無人發覺背囊未經X光檢查,市民知道梗係覺得兒戲,一於向相關官員問話。
市民:你哋啲保安點做嘢?咁大個背囊都冇人睇到?係咪掛住發白日夢!
官員:我哋承認係有漏洞,做得唔好嘅地方……
市民:知衰啦?
官員:冇得賴數啦,片都拍埋……
市民:好好監督班手足啦,如果有人有心犯案,就會造成航空大災難啦!
官員:邊有咁易吖……
市民:做錯嘢仲牙擦擦喎。
官員:返工發吓夢都好正常,咁啱呢次四個保安一齊發夢先出事,呢啲機會率咁難中,真係萬中無一,仲邊有下次先得o架?
市民:#&*@#@!^!!!!!!