政壇：搞搞政：疑保安局同建仔扯貓尾
政府同各個政黨保持良好關係確係好事，但就千祈唔好厚此薄彼，否則容易被批評同啲黨派扯貓尾、打籠通！話說尋日立法會保安事務委員會開會，議員「長毛」梁國雄突然話喺枱面執到份文件，原來係「建仔」民建聯議員梁志祥所有，文件嘅左右上角分別印有「民建聯」字樣同標誌，點知睇真啲，就發現疑似係保安局「私人醒」畀建仔嘅提問「貓紙」。
設計圖片及對白
長毛聲稱執到保安局同建仔打籠通嘅文件。
呢份「文件」上面寫住尋日討論嘅三大議題，包括警隊鼓勵社區參與防罪工作、科技罪案組升格、統一審核機制，點知愈睇愈好笑，最觸目係保安局竟然教埋建仔議員點樣問問題。
教口語化跟進提問
其中涉及處理酷刑聲請嘅「統一審核機制」，保安局就提供埋口語化跟進提問，教建仔議員問：「我覺得呢個新制度係高度公平，但只係對聲請人高度公平，對香港納稅人就高度不公平。」仲話：「一個人如果真係走難，應第一時間申請協助，但資料顯示，佢哋平均嚟咗十四個月先提出聲請，點講都唔通，我想知點解佢哋唔係第一時間出嚟提出聲請？」
另一條標準問題就問：「佢哋留喺香港成十四個月之後，先提出聲請，咁呢十四個月佢哋做緊咩？以咩為生？係咪打黑工？」可以話係有晒指導思想。
長毛即時問保安局局長黎棟國份嘢係咪政府提供，點解淨係畀建仔，其他政黨同議員都冇，覺得好唔公平，點解要友好政黨假扮民意問問題，手法卑劣，唔尊重議會。
梁志祥就澄清文件係內部文件，即時要求同屬建仔嘅委員會主席葉國謙處理文件失竊一事，葉一度扯火，鬧長毛攞咗梁份文件當執到。局長亦冇承認份文件究竟係咪來自保安局，話政府會因應議員嘅興趣提供資料，啲資料點用，問同唔問，發問方式點拿捏，都係議員自決喎！
