港鐵負責興建嘅五條鐵路,工程全部滯後,未必可以如期通車,其中沙中線土瓜灣站更發現工程地盤有古蹟同文物,隨即掀起一場保育戰。

多名立法會議員尋日就出動巡視沙中線考古地盤,之後仲爭相向傳媒發言,好驚執輸行頭。其中白鴿黨嘅議員「一舊雲」黃碧雲就話,佢哋巡視過地盤內嘅宋朝方井,好興奮知道嗰個井係一口活井,「即係宋朝時期啲人喺呢度打水嘅,依家如果我哋想飲,都可以喺呢個井飲到同一口井水!」

據了解,嗰口井依家並無水源,考古專家話可能要繼續向下掘先至有機會掘到水源。不過,唔緊要啦,尋日啲議員個個爭住發言噴口水,睇怕個井唔使掘都搵到水源喇!

第一手消息請下載on.cc東網iPhone/iPad/Android/Windows Phone Apps