政壇：立會秘書處實習生「日薪」99蚊
好多學生都會趁住暑假做「煙腸」（intern）實習生，當吸取工作經驗。我哋尋日就喺立法會見到一批秘書處招募嘅暑期「煙腸」第一日返工，秘書處職員帶佢哋參觀立法會大樓，其中一個「景點」仲係傳媒行家嘅聚集點記者室。
陳維安（右二）向各實習生介紹立法會嘅工作。（受訪者提供）
呢班「煙腸」共有十九人，包括十三名學士學生同六名副學位學生，佢哋會喺六月至七月期間，派駐到秘書處各部門工作，例如去申訴部聽市民申訴，或到公共資訊部帶隊參觀大樓，就連餐飲部都可以試吓。
據聞佢哋仲會分別同主席曾鈺成及五名議員「真情對話」，又會去聽大會、財務委員會、內務委員會等會議。雖然立法會大會隨時開會開到夜一夜，但佢哋工作時間只係朝九晚六，夠鐘就可以鬆人。不過，佢哋每日就只得五十五元車馬費，另加立法會餐廳四十四元優惠券，似乎出手低咗啲喎！
