政壇：金管局宣傳採本地創作
凡係做宣傳，最緊要觀眾有代入感，金管局深明此道，之前用咗「茶記包包系列」入面嘅菠蘿油妹妹幫手做消費者教育，依家仲出埋一系列咖啡杯同文件夾等精品，呢啲本土特色，用嚟宣揚碌卡要精明。
李永誠（穿西裝者）同班參觀金管局資訊中心嘅學生哥影相。
金管局出咗菠蘿油妹妹嘅精品做消費者教育。
金管局法規部執行總監李永誠話，菠蘿油妹妹嘅宣傳方法感覺輕鬆，嚟緊會出埋影片宣傳，今年仲會加入保險產品同私人貸款做教育主打。李永誠話未來再宣傳，都會傾向採用本地創作。
金管局喺一三年推出消費者教育，重點係網上銀行保安及信用卡消費，李永誠希望今年可以拍埋片，第三季會喺地鐵站廣告螢幕做宣傳，同埋網上信用卡論壇加啲橫額。
