政壇：曾鈺成促中聯辦「周圍貢」收料

尋日報道過美國駐港總領事夏千福上任後，作風高調兼頻頻落區大搞親民騷，明剃港府高官眼眉，中央對呢類「外國勢力」介入國家事務耿耿於懷亦正常不過。立法會主席曾鈺成前日出席座談會時就踢爆，曾聽聞有中聯辦或外交部人士認為美國領事館人員好活躍，批評對方「又去茶餐廳」。不過，曾鈺成就將矛頭反指中聯辦，認為中聯辦唔應該怨人哋去茶餐廳、周圍去，中聯辦都好應該「周圍貢」喎！

曾鈺成解釋，外國駐港領事「去茶餐廳」了解民情係佢哋嘅責任，因為佢哋特別想搵親北京人士「收料」，相反中聯辦只係識得搵建制派「自己友」溝通，作用相當有限，寄語中聯辦應該多啲搵泛民主派中人收料喎！佢仲自爆，曾應前美國駐港總領事楊甦棣邀約見面，令對方相當訝異。

講係咁講啫，中聯辦官員都唔係未試過「周圍貢」約泛民人士會面，但泛民連見面地點、係咪單獨會晤都要拗餐懵，一味扭扭擰擰，反應係點，大家都睇到喇。