政壇：議員外訪以色列 工作一日玩三日
立法會議會聯絡小組委員會早前先至話要去北歐三國外訪，但其實另一邊廂，工商事務委員會亦密鑼緊鼓咁籌備緊去以色列。其實議員經常都話要去外訪，仲要次次都有咁遠去咁遠。雖然話每屆議員都會有定額嘅外訪津貼，但使嘅都係納稅人嘅血汗錢，希望佢哋可以積吓陰德，真係有需要先至好外訪，唔好有便宜就使到盡，嘥晒啲公帑！
設計圖片及對白
工商事務委員會早前開會時都討論過話要去以色列外訪，以研究以色列政府推動創新科技發展嘅經驗。委員會尋日就出咗份有關以色列外訪嘅文件，話將於今年八月三日至八日前往以色列進行職務訪問，預計每名議員嘅機票、酒店、膳食同市內交通開支為二萬九千五百元至五萬八千元，視乎議員選擇乘搭經濟客位或商務客位。
方剛或蔣麗芸帶隊
唔知呢次外訪團會係委員會主席方剛抑或副主席蔣麗芸帶隊呢？但無論邊個帶隊，參加外訪嘅議員定必好疏乎。
點解？根據委員會文件，扣除搭飛機嘅時間，班議員就只有到達當地嘅翌日有行程安排，包括參觀以色列國會、同相關委員會成員會面、同當地政府機關官員見面、參觀當地主要大學、研究機構及私營機構，其餘嘅幾日竟然都冇行程安排。吓！工作一日玩三日？唔通班議員係用公帑去自由活動、遊山玩水？其實一場去到以色列，睇怕佢哋都不甘只屈喺首都特拉維夫，近近哋可以去埋耶路撒冷。
立法會秘書處就話，其實議員喺以色列日日都有活動安排，甚至喺回程當日嘅早上都有參觀活動，只係秘書處仲同緊當地接待部門聯絡緊，未確定到行程，先至冇詳細列明喎。
雖然議員每屆都會有五萬五千元嘅外訪津貼，但花嘅每一分每一毫都係公帑，希望班議員外訪，真係能夠認真吸取外地經驗，對香港發展有啲貢獻啦！
