官僚各自為政 違泊遍地開花

呢，本港電單車泊位奇缺，加上政府部門各自為政，甚至連「門前雪」都唔肯掃，部分電單車司機乘機博大霧，將公共屋邨、行人天橋同行人隧道變成私家泊位，有啲甚至泊咗幾年都未試過畀警方抄牌，結果導致庫房損失不特止，亦對附近居民造成滋擾，而人車爭路更構成嚴重安全隱患添。

好似其中一個重災區筲箕灣耀東邨咁，部分違泊熱點高峰時泊咗過百架電單車，其中幾十架更係雙排泊車。咁搞法唔使審都知違例喇，奇就奇在居然冇人理。究竟點解呢？原來，部分地方同一路段分別由三個部門負責，房屋署管轄限制道路，行人路就分別由路政署同地政總署負責，警方只能夠抄地政總署管轄範圍內嘅違泊電單車，唔怪得車主有恃無恐喇。

俗語話，三個和尚冇水食，真係講得冇錯，多個部門管轄變咗冇人管，警察抄牌抄啲唔抄啲，路政署固然闊佬懶理，而房屋署除咗出警告信，同樣乜都唔做。最離譜就係，有區議員曾要求房屋署加強執法，對方居然大條道理話，唔執法係因為「唔夠鎖」，費事鎖啲唔鎖啲喎。咁嘅藉口都諗得出，問你服未！

難為房屋署仲大言不慚話，過去三年曾向一百六十幾架違泊電單車發出警告信喎。喂，全港咁多公共屋邨，違泊問題咁嚴重，平均每年發出五十幾封警告信，你話有乜嘢作用吖？

正所謂，冰凍三尺，非一日之寒，電單車違泊問題唔係今時今日至有，之所以愈來愈嚴重，除咗當局執法不力之外，泊車位長期嚴重不足，亦係主要因素。現時全港電單車登記總數有六萬一千二百幾架，但電單車路邊泊位九千個都唔夠，簡直係杯水車薪。有車主曾去信當局要求加建電單車泊位，結果畀官僚當「人球」踢嚟踢去，連搵邊個部門都搞唔清楚。話時話，有頭髮邊個想做瘌痢吖，當局規劃不當，設施不足，又唔撥亂反正，翹埋雙手乜都唔做，車主冇辦法咯喎，咪惟有周圍亂咁泊車囉。

美國前總統列根話過，政府本身至係問題所在。電單車違泊氾濫成災，問題就喺港府身上，官僚闊佬懶理，有乜辦法唔亂象叢生吖。解鈴還須繫鈴人，當局究竟仲想拖到幾時呢？係咪要等車主將電單車泊到政府總部至肯做嘢吖？叮！