SUN奇古怪：SUN潮語：【CD-ROM】
「CD-ROM」作潮語解，即係指一啲人平時喺網上討論區或者Facebook，都只係齋睇唔會打字留言，呢啲人士就被稱之為「CD-ROM」，即係Read Only。
電腦科技日新月異，呢頭買完部新機，嗰頭就已經變成老爺機。唔止硬件係咁，軟件一樣要經常更新，有時都覺得幾煩。電腦普及化都只不過三十年光景，到底你嘅人生又擁有過幾多部電腦？
記得以前第一部電腦嘅型號叫做8088，係綠色螢光幕。當時係1988年，Windows視窗系統還未面世，更加係無上網呢回事。叫電腦做嘢要識用一個叫做DOS嘅系統，全稱係Disk Operating System，要喺鍵盤打入一啲指令去操作電腦。
最爆嘅係嗰部8088嘅CPU，即係中央處理器，容量只有256K。無錯！係256K唔係256G！即係依家求其一部手機，處理器嘅速度都比部大牛龜電腦快上十萬倍！仲有，嗰部8088係無內置硬碟，全部資料只靠一片片12吋半嘅磁碟機存取，當時唔好話CD-ROM未出現，連CD都未有，聽歌都仲聽緊卡式帶同唱片！
提起CD-ROM，大家都會知道係電腦光碟，用嚟儲存資料。但其實「CD-ROM」本身都係一個潮語。「CD-ROM」全名係Compact Disc Read-Only Memory。大部分電腦都內置有CD-ROM Drive，用嚟讀碟。咁點解呢個明明係硬件又成為咗潮語嘅呢？
「CD-ROM」中文叫做唯讀記憶光碟。可能因為「唯讀」呢兩粒字，同「Read Only」嘅緣故，淨係睇唔出聲嘅人就叫「CD-ROM」。點解會有人做「CD-ROM」嘅呢？有可能係覺得自己文筆差，或認為自己不善表達，亦有可能是不想身份暴露於一啲討論區，尤其係一啲成人網站或有成人內容嘅群組。
其實對於社會發生嘅事，好多香港人何嘗不是「CD-ROM」？唔好話政改佔中呢啲政治議題，就算係民生切身嘅事，都一樣「CD-ROM」！好似出事頻頻，質素愈嚟愈差，愈嚟愈唔似樣嘅港鐵，竟然厚顏無恥地申請加價3.6%！香港人又可以欣然接受，唔出聲繼續做「CD-ROM」。香港人咁好恰，啲大財團真係唔屈你都對唔住自己！
