立法會拉布戰將於本周三踏入尾聲，雖然幾個星期以來嘅苦難終於結束，但唔少議員同官員就因為今次拉布而患上拉布症候群，陳年隱疾紛紛走晒出嚟。社民連梁國雄早前話，拉布搞到佢便秘，無得去廁所外，主席曾鈺成更加喺前晚宣布休會前自嘲，問在座建制派議員有無患上斯德哥爾摩症候群，對拉布議員出現好感？

設計圖片及對白

尋日即刻有政府高官反責主席，表示絕對唔會患上呢種病，仲對拉布行徑深惡痛絕添。睇嚟，患上斯德哥爾摩症候群嘅人，可能另有其人噃。

講開拉布症候群，有議員飽受精神困擾兼幾乎出現幻聽，唔少議員更紛紛投訴拉布影響佢哋身體健康，好似新民黨副主席田北辰咁，佢就話拉布搞到佢連洗手間都要分兩次去，或者如廁後未洗手就要返去投票，非常唔衞生。人民力量陳志全就抱怨長期坐喺議事廳坐到個屁股好痛，驚影響到坐骨神經，打算拉完布後去搵按摩師傅揼骨，兼乘機休息吓喎。

第一手消息請下載on.cc東網iPhone/iPad/Android/Windows Phone Apps