世界盃就嚟開波，尋日立法會議員陳克勤同埋莫乃光（Charles）等出席一個推廣世界盃節目，克勤身為立法會足球隊隊長，尋日卻只喺場邊督師，講到細個踢波，佢透露當年屋企無錢買正規足球，惟有買五蚊一個嘅西瓜波喺屋邨踢。但西瓜波充氣位有粒的，克勤又成日練頂頭槌，結果搞到額頭經常有紅印。

陳克勤見到西瓜波，就諗起細個被充氣位粒的搞到額頭有紅印嘅事。

最弊嘅仲係，成日有人投訴佢哋踢波太嘈，所以保安員就時不時沒收佢哋嘅波，搞到佢哋只好用報紙自製足球，但額頭就會變成黑色，於是佢哋靈機一觸，將啲報紙塞入隻襪，咁都得？克勤聲稱係向球王比利偷師喎！

第一手消息請下載on.cc東網iPhone/iPad/Android/Windows Phone Apps