政壇：啟剛孖青聯靚女學包糉
端午節嚟喇，香港青年聯會副主席黃夢瑩（Monin）尋日搵埋班青聯手足，齊齊向酒家資深廚師學整鹹肉糉，然後分贈畀長者及露宿者。青聯主席霍啟剛、副主席林玉茵（Maya）等人都去趁熱鬧，仲有青聯常董蔡敏思（Mence）、會董邱詠麒等，大家雖然雞手鴨腳，但就為傳統食品帶來創意，好似Maya就喺糉葉添上蝴蝶結。
霍啟剛（左）用牙咬住水草紮糉，雞手鴨腳。
排糉葉、放餡料、紮糉等步驟睇落好似好簡單，但就考起一眾叻仔叻女，Monin初初未能掌握糉葉嘅鋪排，啟剛就學足謝師傅咁用牙咬住鹹水草紮糉，但不得要領。佢哋兩人都唔願求其了事，多次向師傅請教，反覆嘗試，終於都有外表似模似樣嘅鹹肉糉面世。
啟剛話佢同太太郭晶晶都鍾意食糉，不過口味各有不同，事關太太係北方人，鍾意食甜糉。
負責幫呢班靚仔靚女執靚啲糉嘅謝師傅就話，呢班初哥包糉手法生硬在所難免，不過外形係其次，最緊要食材安全、衞生，咁長者及露宿者就食得開心喇！
