政壇：葉劉怕曬黑唔敢扒龍舟
新民黨同公民力量（公記）早前「閃婚」，雙方不時舉辦活動、增進感情，聽日端午節，佢哋都組隊參加龍舟賽，尋日仲喺沙田石門舉行授旗儀式，新民黨主席葉劉淑儀、副主席潘國山都有到場，不過葉劉就冇落水扒艇，葉劉乖女葉榮欣（Cynthia）話，媽媽怕曬黑，所以由佢「代母出征」喎！
葉劉（左）着到極密實，敲吓鼓就算。
尋日氣溫高到三十幾度，但葉劉都密實現身，只係敲吓鼓、做吓騷。Cynthia就有備而來，搽到成身都係防曬用品，佢話本身唔識扒龍舟，但備戰兩個月，已經曬到黑晒，連化妝品都要換過，遷就新膚色喎！留學美國多年嘅Cynthia始終鬼妹仔性格，笑言膚色深啲畀人感覺健康啲，都唔會太介懷。潘國山就笑言，今次聯盟參賽足見兩黨「坐埋同一條船」，絕對唔會反艇咁話。
