全民退保成共識 究竟還要拖幾耐

大家有眼睇o架，本港貧富懸殊愈來愈惡化，人口老化愈來愈嚴重，唔少長者老無所養，晚景淒涼。咁又難怪嘅，基層打工仔餐搵餐食餐餐清，應付日常生活已經捉襟見肘，積穀防饑更加唔使諗。「臨老唔過得世」已經成為本港深層次矛盾之一，亦成為社會怨氣嘅主要根源，簡直係呢個所謂國際都會嘅莫大諷刺。

點解會搞成咁呢？咪就係因為港府唔肯承擔囉。官僚淨係識望天打卦，翹埋雙手乜都唔做，對打工仔退休保障闊佬懶理，基層長者又點可能有好日子過吖。其實，全民退休保障制度早已成為社會共識，當局諸多推搪，拖得就拖，根本就係不負責任。

呢，有政黨調查顯示，逾七成六受訪者聽聞過全民退休保障計劃，超過七成受訪者贊成年滿六十五歲人士應可獲得一筆退休金。民意彰彰明甚，市民普遍認同設立全民退休保障計劃，呢個結果同其他類似嘅調查大致脗合，證明人同此心，心同此理，依家嘅問題係，港府肯唔肯做、肯唔肯承擔啫。

嗱，港府煞有介事邀請學者研究全民退休保障計劃，報告仲未發表，學者先建議設立「長者老年金」，領取資格只規定年齡六十五歲或以上，毋須資產審查，每月金額高於現行生果金或長者生活津貼。有關報告將於七月初發表，港府被踢爆要求加入長遠財政計劃工作小組嘅財政數據，你話係咪有蠱惑吖？

係人都知，呢個小組嘅數據十分保守，一味強調未來人口老化對政府開支構成嘅壓力，而且語不驚人死不休，聲稱七年後可能出現結構性財赤，令人質疑港府有意操控報告內容，拖延推行全民退休保障。

講真，本港安老政策天殘地缺，有人話連第三世界都不如，真係冇講錯o架。本港係全球最長壽地區之一，亦係長者貧窮問題最嚴重地區之一，試問港府咁多年嚟為老人家做過啲乜？政府庫房財政儲備已經超過七千億元，完全有能力亦有需要推行全民退保，但當局一直推三推四，對長者一啲承擔都冇。所以話，港府扶貧安老講多過做，非不能也，實不為也。

太一叮都係嗰句，拖得過初一，拖唔過十五，人口老化響起警鐘，港府始終要面對現實，全民退保避無可避，如果再拖落去，遲早搞到公公婆婆拉大隊「佔中」嘅咋，叮！