SUN奇古怪：SUN潮語：【恐同】
「恐同」係「恐懼同性戀」嘅簡寫，亦同時代表一種叫「同性戀恐懼症」嘅心理病。「恐同」其實喺世界好多唔同嘅地方出現，英文叫「Homophobia」。「恐同」者唔單止恐懼同性戀，仲會憎恨同討厭同性戀人士，更甚者仲會以暴力攻擊佢哋。
1988年，本地樂隊達明一派發表咗一首經典作品叫做《禁色》。歌詞有幾句：「毋須惶恐，你在受驚中淌淚。別怕！愛本是無罪！」點解受驚？點解要流淚？因為《禁色》係講同性戀。二十六年前嘅香港，同性戀算係相當大膽同前衞，仲要係大忌。如果知道邊個有同性戀傾向，可以公然歧視同羞辱。所以，當時好多同性戀者或雙性戀者都活喺惶恐之中，同愛人一齊都要偷偷摸摸。今時今日，人係絕對有自由選擇性取向，同性戀更唔係用嚟判定一個人嘅好壞對錯。但唔知點解，香港硬係有班友超級「恐同」，大搞「反同」遊行，干涉個人自由，硬將自己價值觀套諸別人身上，有佢講冇人講。
近日有班所謂家長同一啲自稱基督徒人士，但有幾個熟口熟面疑似「政治打手」，即係收錢示威嗰種，不斷走出嚟示威搞反同性戀，令到「恐同」成為咗潮語。
有部分「恐同」嘅人都有仔女，佢哋「恐同」成風，可能會導致佢哋嘅仔女變成同性戀。有啲有宗教背景嘅人甚至訴諸聖經，指同性戀係邪惡會破壞家庭價值。美國基督教右派，簡稱「基右」就常振振有詞反對同性戀。
話說回來，香港呢班經常反對同性戀嘅「恐同」人士，思想點解仲可以咁古老？如果有一日佢哋個仔話佢鍾意同性，係咪就以後唔再愛佢？定係走去跳樓後悔自己生個同性戀嘅仔女？如果你歧視同性戀，我會同樣歧視你歧視同性戀。因為我相信，愛係無罪。
