政壇：搞搞政：搵吳得掂落區 嫻姐未諗掂
問責官員表現參差，邊個得、邊個唔得，經常同佢哋交手嘅立法會議員好清楚。身兼黃大仙區議員嘅立法會議員陳婉嫻（嫻姐）就有自己嘅一把尺，嚟緊佢計劃邀請局長們落區了解市民對社會福利、住屋及醫療等政策嘅意見，今日就安排勞工及福利局局長張建宗去派家電畀長者，嚟緊仲有幾個局長，但教育局局長吳克儉呢？答案係：諗緊！事關吳得掂成日搵下屬代答，既然係咁，落區搵佢下屬都得喇。
設計圖片及對白
嚟緊六月，嫻姐搵咗運輸及房屋局局長張炳良探訪板間房住戶，之後仲邀請食物及衞生局局長高永文見市民，傾吓急症室服務不足嘅問題。教育呢？嫻姐話，有唔少家長好關注十五年免費教育政策，但吳得掂喺立法會都成日搵教育局嘅甲、乙、丙、丁代答，如果搵佢落區又係咁，冇乜意思，不如直接搵副局長楊潤雄或常任秘書長謝凌潔貞好過。
講講吓，提到近期一炮而紅嘅商務及經濟發展局副局長梁敬國（Godfrey）。嫻姐為Godfrey抱不平，話佢好熟書，唔明白點解立法會主席會唔識人喎。而高永文就最接近「地氣」，佢嘅副手陳肇始就好勤力，甚至啱啱上任冇耐嘅發展局政治助理馮英倫最醒目。
