政壇：陳偉業反對議員訪北歐
立法會議會聯絡小組委員會建議九月立法會放暑假期間，齊齊組團去北歐外訪，其中有九個名額由立法會額外補貼，即係有九個議員使費全免。尋日立法會內務委員會討論呢個建議，結果都獲得大比數通過。不過，議員陳偉業就反對，佢話，議員同啲司局長一樣，歐、美、澳、加去齊晒，又唔見香港有咩進步，仲話議員霸到位就有得去外訪，似旅行團多過去公幹，認為議員唔應該有呢啲特權咁話。
小組委員會主席劉慧卿話，佢哋已經好多年冇出訪，對上一次已經係○九年去中歐，今次佢哋外訪國家包括芬蘭、挪威及丹麥，立法會秘書處已聯絡有關國家嘅領事接待，只要內委會一批准，就可交畀立法會行政管理委員會委託秘書處辦理。講到萬事俱備，只欠東風，平時開會又唔見佢哋有咁高效率？
其實，市民對於立法會議員經常公帑外訪好不滿，但議員都係自己傾、自己話事，官員外訪，佢哋可以制衡，咁議員外訪，係咪應該整個監管機制呢？
