政壇：大輝 張宇人換鞋趕撳鐘
立法會連日表決預算案撥款修訂，啲議員都出盡法寶，為咗及時埋位投票表決，平日官仔骨骨嘅工業界議員林大輝就專登買咗對懶佬鞋，貪佢唔使綁鞋帶，方便跑上跑落，及時「撳鐘」。飲食界議員張宇人（Tommy）亦換上一身便服及網球鞋應戰。
大輝（左）同張宇人不約而同穿上舒服鞋出席立法會。
林大輝對拉布鞋有乜特別？據講，對鞋買咗幾千蚊，穿着簡單、容易。拉布戰都就嚟結束，睇怕佢對鞋要留待下次再着啦。
Tommy尋日就以網球鞋上陣，佢透露，對網球鞋只係幾十蚊，同大輝嗰對相比，又平又舒服喎！細心睇吓，佢對鞋係瑞典貨，真係幾十蚊？原來Tommy講緊係幾十蚊歐元，咁都幾百蚊喇。
