政壇：陳繁昌 黎慶寧重遊舊皇仁
上環創意產業地標「PMQ元創方」所在地，係皇仁書院前身中央書院，尋日三十幾度高溫，一班西裝骨骨嘅男士卻喺上址參觀，原來佢哋都係皇仁書院校友，當中有身兼皇仁舊生會名譽顧問嘅科技大學校長陳繁昌，久未露面嘅保安局前局長黎慶寧等。
陳繁昌（中着西裝者）參觀時，不停用相機影相。
黎慶寧有份參加皇仁嘅保育工作。
一大班校友回巢，皇仁師生亦出動招呼，期間，陳繁昌帶領大家高呼三聲，然後大大聲唱校歌，氣氛好high。
陳繁昌表示，當年佢係中六插班升讀皇仁，雖然只係讀咗兩年，但對母校嘅感情深厚，今次特登返嚟尋根。講番當年，佢話啱啱入學時，同學都唔介意佢係新丁，大家一齊玩一齊學習，最難忘係一班同學利用簡單物料自製收音機，對佢日後實現科研夢有好大影響。所以佢寄語香港人，應該抱住呢種皇仁精神，接納同包容新來者。
至於黎慶寧就透露，佢爸爸曾經喺中央書院上過堂，兩父子都係皇仁仔。黎慶寧又話，○六年由澳洲返港居住，獲邀參加皇仁嘅保育工作，試過喺儲物室搵到好多歷史文物，包括試卷、舊相及書籍等等，佢希望可以將呢啲瑰寶好好保存，等後人了解歷史，皆因「忘記歷史只會重複舊錯」喎！
