政壇：星爺為剪布猛收料

事關席上有人話，最近立法會嘅不良習慣好似蔓延至區議會喎，講嘅係議會內衝突，定係拉布情況呢？而未做過區議員嘅立法會財委會主席吳亮星，更對區議會有冇拉布現象好感興趣，不斷咁請教啲區會主席同副主席，莫非星爺想搜集多啲剪布良方？

立法會每年都會宴請十八區議會正副主席到立法會午宴，增加彼此間嘅溝通，過去大家都幾踴躍，但尋日就冷清咗啲，區議會方面只有十多人到場，有啲區更無人嚟添，或者只派副主席出席，而新界嗰九個區議會嘅主席齊齊冇影添，點解？據聞，其中一個最主要原因就係，新界嘅呢班區議會主席情願去西環食飯，傾吓點籌劃七一活動。

論盡兩級議會情況

至於立法會方面，出席午宴嘅立法會議員人數都唔少，比區議會代表多約三倍，主要係建制派議員出席，泛民方面，一隻手都數得晒，包括劉慧卿、梁家傑、黃毓民等。聚會人數少，係咪表示地區同立法關係亦唔太好呢？

不過，尋日大家都有共同話題，會上猛講兩級議會嘅拉布事宜。據講，有唔少立法會議員都向區議會主席請教點喺區議會拉布同剪布，尤其係冇做過區議員嘅立法會中人，佢哋感興趣嘅問題有：區議會有冇拉布？冇有剪布機制？其實，一啲區議會早就出現過拉布現象，只係影響相對細，冇乜受到關注。