港鐵卸膊藉口多 賴完地硬賴地軟

嗱，話口未完又一鑊，今次同樣係衰工程延誤。港鐵承認西港島線未必能夠如期喺今年十二月通車，可能要明年第一季至可以啟用，原因係西營盤站B出口未能按時完工喎。

點解未能按時完工吖？運輸及房屋局官員出嚟解畫，聲稱工程遇到唔少困難及挑戰，為免影響附近樓宇，西營盤站出入口工程要採用凍土挖掘法，由於進度緩慢，未能趕及工期。其實早排港鐵曾透露，西營盤站B出口因為土質鬆軟要改變鑽挖方法，導致工程滯後喎。

睇嚟港鐵高層及港府官員都係姓賴，高鐵延誤賴地硬，依家西港島線延誤就賴地軟，乜都佢哋講晒。咁就奇喇，唔通動工前冇做過土質勘探同評估嘅咩？硬又唔得，軟又唔掂，係咪一定要搵軟硬適中嘅「中性土質」，先至可以保證工程唔延誤吖？

最離譜就係，西港島線離原定通車時間只剩半年，港鐵至承認延誤，擺明又係隱瞞喇。

講開隱瞞，大家早就見怪不怪咯。前排高鐵工程爆出嚴重延誤醜聞，超支可能數以百億元計，港鐵同港府唔止冇坦白交代一切，反而互相推卸責任，遮遮掩掩，企圖用大話冚大話，藉口更係層出不窮，賴天賴地賴人手，幾乎想賴埋蛇蟲鼠蟻佔領地盤添，問你服未！

正所謂，衰開有條路，呢頭西港島線工程延誤，嗰頭南港島線又因為金鐘站工程問題多多，未必可以喺明年通車。即係話，港鐵目前進行緊嘅高鐵、南港島線、西港島線、沙中線及觀塘延線工程，幾乎全部延誤，你話係咪離譜吖？唔使問阿貴，工程延誤必定導致成本超支，納稅人睇怕有排填氹咯！

港鐵工程招標話就話價低者得，其實結果啱啱相反，由於工程延誤而導致嘅損失，隨時妹仔大過主人婆o架。好似高鐵咁吖，因工程延誤而衍生嘅開支難以估計，截至今年三月底，港鐵已收到承建商六百幾宗索償個案，金額超過一百億元，搞到高鐵應急費幾乎乾塘，隨時要向立法會追加撥款。價低者得無非想節省成本啫，結果弄巧反拙，因減得加，簡直捉蟲。

唉，港府監管不力，基建唔延誤至奇喇。正如有人話齋，港府監督港鐵工程一味文件往來，雙方淪為筆友關係，點會唔互相包庇吖。咪話太一叮唔提醒，大型工程一個個爆煲，納稅人被迫埋單，呢筆帳一定會追究到底，絕對唔會「疑中留情」o架，叮！