應屆立法會運作就快兩年，近排卻接連發生一啲小插曲，如主席唔識上任半年有多嘅問責副局長，議員之間其實都唔好得去邊，好似勞工界潘兆平（潘少）就話，佢對其他同事嘅認識都唔夠，尋日喺立法會開會時，就見佢用電腦瀏覽民主黨黃碧雲（一舊雲）嘅資料，仲要睇咗十分鐘咁耐。

潘兆平尋日喺議會內，瀏覽同事資料。

點解潘少要睇咁耐呢？佢解釋，當時只係見得閒，就開部電腦睇吓其他議員嘅資料，並唔係特別留意邊一位，亦唔會特別留意黃議員喎。不過，當事人一舊雲就表現得好大方，笑笑口話多謝潘少咁留意自己。

呢一屆立法會增加到七十人，又多咗好多新丁議員，咁啱尋日兩個當事人都係新丁，只係兩年就快到，大家又經常一個會議室開會，但都要靠電腦增加了解，果然係現代人！

第一手消息請下載on.cc東網iPhone/iPad/Android/Windows Phone Apps